பயணம்
ஏறும் வழியிலிருந்து
இறங்கும் படியிடம் நெருங்குவதற்குள்
சக்கரங்கள் தின்றிருப்பது
அறுபது வருடங்களையா
தலை நரைத்துத் தள்ளாடி
உடல் சிறுத்து
உயரப்பிடிக்கும் கை தளர்ந்து
இருக்கை கம்பியைப் பற்றிக்கொண்டு
சரியான சில்லரையை நீட்டியபடி
என் பெயர் மூப்பு
என் ஸ்டாப்பின் பெயரும் அதுவே
தனிமை
மூக்குக்கண்ணாடி
பாரகான் செருப்பு
பதற்றம்
மிகுந்த முன்னெச்சரிக்கை
அடிக்கடி பாக்கெட்டை தொட்டுப்பார்த்துக்கொள்ளும்
ஜாக்கிரதை உணர்ச்சி
அனைத்தும் மூப்பு அருளியது
என்ற இரைஞ்சுதலுக்கிடையில்
நிறுத்தத்தில் இறங்க
சற்றே சகாயம் பண்டுங்கள்
எனும் கூற்று
தள்ளிவிடச் சொன்னதாய்
நம் செவியில்
விழுந்தது எப்படி
எதிரி
மேலோட்டமாய் பழகுதலுக்கு
இருவருமே
நன்கு பயின்றிருந்தனர்
நீரினில் விழும்
பந்தோ கனியோ
ஓரடி உயரவே காற்றில் மிதக்க வைக்க
முடிவதென்பது
அந்தரத்தில் இருவராலும்
நிகழ்த்தப்பெரும்
ஆச்சர்யங்களில் ஒன்று
அருகருகே அமர்ந்திருந்தும்
திரைப்படத்தின் முதல் ரீலில் அவனும்
ஆறாம் ரீலில் இவனும் இருந்து
ஒட்டுமொத்த திரைக்கதையையும்
குழப்பியடித்தாலும்
வில்லன் என்றொருவர்
வெளியில் இல்லை
இருவருக்கும்
நாற்பது கிலோ மீட்டர் வேகம்
நெடுங்காலமுமற்ற
வெகு அருகாமையுமற்ற
மையத்தில் இருந்தது
நீ
உறுதிப்படுத்தியிருந்த தினம்
என்னை நோக்கிய
அதன் நகர்வானதும்
அவ்வாறே
துரிதமற்றும்
நிதானமற்றும்
நடு நிலையில்
நெருங்குகிறது
அந்த நாள் உண்டு பண்ணும்
அற்புதத்தின் மீதான
அதி ஆர்வமோ
காத்திருப்பின் மீது தத்தளிக்கின்றது
முன்னொரு காலத்தில்
நாம் காதலர்கள்
ஊர் மெச்சும் சிறந்த ஜோடி
இன்று
சூழல் அப்படியா இருக்கின்றது
அந்த மேடையிலிருந்து
இடது புறமாய் நீயும்
வலது புறமாய் நானும்
ஒரு சேர கீழிறங்கினோம்
சரி பரவாயில்லை காலத்தின் போக்கு
தற்போது
திடுமென கழுத்தில் கத்தி வைத்த
ஒரு முகத்திற்குள்
நீயிருப்பாய் என
சிறிதும் நினைக்கவில்லை
பென்சிலை சீவுகிறாய்
சீவிக்கொண்டேயிருக்கிறாய்
கத்தரிக்கோலின் துவாரத்தில்
சிக்கிக்கொண்ட என் கட்டைவிரல் பற்றி
உச்சபட்ச வலியைப்பற்றி
அப்போது வழிந்த குருதி பற்றி
விவரிக்க
விவரிக்க
மேலும் சீவுகின்றாய்
ஒரு தருணத்தை
திறம்பட கையாளும் கூர்மையின் முன்
செய்வதற்கேதுமில்லை
இருந்தும் மண்டியிடுவது
அது எழுதும்
ஒற்றை ஆறுதல் சொல்லிற்குத்தான்
