அலறித் துடிக்கும் பிரதிகள்
எழுதுவதில்
என்ன இருக்கிறது
சிலுவையில் ஒன்றை
அறைந்து வைப்பதுதானே அது
உயிர்ப்பிக்கும் அற்புதம்
வாசிப்பில் இருக்கிறது
வாசிப்பு என்பது
மறுபடைப்பு என்று
சொன்னாலும் சொன்னார்கள்
கை நிறைய
ஆணிகளோடு வந்து
எற்கனவே சிலுவையில் தொங்குபவரின்
கேந்திர ஸ்தானங்களில்
ஆழ இறக்கிப் போகிறார்கள்
அற்புதம் அற்புதம் என்னும்
சிலுவை ராஜனின் குரலோ
பரலோகத்தை எட்டுகிறது.
பிரதி என்னும் வரிக்குதிரை
வரிக்குதிரையொன்றின்
வரிகளுக்கு
வேறு வேறு அனுபவங்கள்
அதன் இணை
அவ்வரிகளை நெருங்கும் போது
அர்த்த கனத்தில்
இரட்டிப்பாகின்றன வரிகள்
ஒரு புலி அதனை
எதிர்கொள்ளும் போது
கூரிய நகங்களில்
சிவப்பு அடிக்கோடிட்டு
வரிகளைத் திருத்தத் துவங்குகிறது
முன்னதை வாசகனும்
பின்னதை விமர்சகனும்
ஆனமட்டும் நிகழ்த்திக் கொள்ள
அகட்டி நிற்பதே
பிரதிக்குதிரையின் லட்சணம்.
